La Union di Ladins de Gherdëina fej al savëi che n sada ai 25 d’agost 2018 mët nosta lia inò a jì, coche bele da tradizion, l “Domesdì Leterer Ladin Alalergia” cun autëures y mujiga dala Ladinia.Chëst ann ulons nvië autëures jëunes y jëuni de duta la valedes ladines a fé pea pra n poetry slam, presentan poejia o prosa ritmeda ti sonns y tla usc. L argumënt dl poetry slam ie “Ti dé tëmp al tëmp.“ Perchël nvions i autëures nteressei a scrì y presenté vel‘ pez leterer cun chësc argumënt. Pra chësta sort de manifestazion ne n’à i autëures nia drë de dé ju danora l test, ma ie mé priei bel de nes fé al savëi sce i uel fé pea nchin ai 30 de juni.

L Domesdì Leterer Ladin alalergia dà bele danora da ntënder che l se traterà de velch de particuler y nteressant per duc, jëuni y manco jëuni. La manifestazion se stlujerà ju cun mujiga da druch y festa.La Union di Ladins de Gherdëina nvieia dutes y duc a fé pea pra chësta manifestazion!