Liber di ghesć   |   Links   |   Cuntat   |   E-Mail   |   Home    
La Usc di Ladins
   


La Usc di Ladins ie nce su F A C E B O O K
  I vares plu mpurtanc dal 1949 nchin al didancuei
Da "Nos Ladins" a "La Usc di Ladins"

De Georg Mussner
    
 
Cialan de reviërs tla storia nes vëniel a lum "L'Amik di Ladins", y "Der Ladiner", sfueis culturei tla rujeneda ladina che univa dac ora da studënc ladins a Dispruch y a Persenon, ma che à abù, do la rata, mé vita curta. Per la storia dla jënt ladina ie chësta prima publicazions no mé de mpurtanza storica, ma dà nce da ntënder che bele ntlëuta - tl 1905 - fòvel na cërta ulentà de scrì per ladin dajan nsci mo plu pëis a si identità. Do la Segonda Viëra Mundiela fòvel mo d'autri sperimënc sun l ciamp jurnalistich che à giapà vita te "L Popul Ladin" y "Zent ladina", publicazion che univa dates ora a Maran y che à ënghe stentà a se tenì mpe plu giut. Dla prima zaita ladina pòssen pona permò rujené canche l dr. Salvester Erlacher ova dat ora "Nos Ladins". Y da ntlëuta iel passà avisa 50 ani! Per nëus na bela ucajion per pensé dò y cialé coche la dëssa jì inant cun la stampa ladina. De nuvëmber dl 1972 , canche la Union Generela di Ladins dla Dolomites ova sëurantëut la zaita ladina "Nos Ladins" la batejan cun "La Usc di Ladins", àla dessegur tëut na bona dezijion. L redatëur y editëur de "Nos Ladins", l dr. Salvester Erlacher, ti ova mandà al cunsëi dla Generela na lëtra ulache n pudova liejer danterauter chësta risses de desperazion.
     
 

"L lëur de redazion, coordinazion y dantaldut la spëises de stampa à fat sci che ne posse nia plu me tò sëura de dé ora "Nos Ladins". Al dr. Erlacher ti stajova a cuer la situazion di ladins y si majer pensier fova chël de coche n pudëssa fé a lië adum duc i ladins y co mëter pesc y union tla families y ti luesc dla Ladinia. Do la Segonda Viëra Mundiela fova la populazion unida spartida sù te trëi provinzies y nce danter chësta n fòvel de tei de uni culëur; l n fova de tei che ti ova simpatia ala idées fascistes, d'autri jiva dò a chëles nazistes. Ti luesc y tla families fova ruvà l sënn che univa mo tizà dala politica naziunalistica contra i ladins. Per se dé da ntënder, per desmustré che l popul ladin fova mo tlo, fòvel unì metù a ji de lugio dl 1946 sun l jëuf de Sela na gran ancunteda ulache l univa jurà la unità ladina. Danter i 3000 partezipanc fovel nce l dr. Erlacher, che trëi ani do ova dat vita a na si idea; chëla de fé na zaita per la populazion ladina ti dajan l titul "Nos Ladins". Per na mendranza ie i mesuns de nfurmazion de mpurtanza essenziela; avëi na zaita che porta bele regulermënter articuli y stories, cronaca y minonghes che à da nfé cun la rujeneda, cultura y vita dla mendranza, tën "mpiëda la flama" y nsci nce la vita de na mendranza linguistica. La populazion ladina à pedú tl ann 1999 festejé n bel anuel y plu avisa chël di 50 ani da canche i à na zaita.

   Erlacher finanziova nstës la "Nos Ladins"
Ai prim de merz dl 1949 ova nsci la stamparia Weger de Persenon dat ora l prim numer, ulache l ie da liejer sun la prima plata n salut ai ladins y ulache Erlacher scrij danterauter che l "fin de chësta zaita ie chël de cunservé nosta rujeneda y de unì spiritualmënter duc i ladins, per defënder miec i nteresc de duc i ladins y fé flurì nosta bela valedes." Riesc dò, ai 15 de dezëmber dl 1950 , univa la plata bele ora uni chindesc di. "Nos Ladins" fova na bona funtana de cultura ladina y de nuveles de nosc luesc. Sun diesc plates per zaita fovel da liejer nutizies dala Val Badia, Gherdëina y Fascia; plu tert mandova nce Fodom ite vel pitl articul. De Anpezo iel da udëi plutosc puech ti prim numeri de "Nos Ladins". Nce sce l redatëur ova n gran lëur y cruzi cun chësta si "criatura", univa l lëur drët stimà. Te n articul dla "Dolomiten" dl 1952 vëniel laudà l mpëni dl redatëur y scrit dl suzés de chësta zaita.

 

 
"L servisc de nfurmazion dala valedes funzionea bën y sce la va inant nscila pona iel da ti udëi danora n bon daunì a "Nos Ladins", unìvel scrit inant. Cunscidran chësta zaita vëniel sù n cër ncresciadum a ti cialé al "sföi" plutosc scëmpl ma daulëibon. Sainsom n dessëni cun l crëp de Mëisules, a man ciancia n Crist, a man drëta na capela arsida tla nëif y tamez la gran scrita "Nos Ladins" y "Sella". Erlacher ova la bona ntenzion de descedé cun chësta publicazion inò chëla cusciënza ladina che te trueps fova jita perduda y de renfurzé la identità danter i ladins. Mpurtant fova dantaldut nce de mantenì y de svilupé la rujeneda ladina y la cultura y tres na zaita sciche "NOS LADINS" se nmaginova Erlacher che la jissa plu saurì. L ne n'ova nia abù tort, nce sce te chëi ani ne fòvel nia saurì fé n cont de "cusciënza y identità ladina". Vintetrëi ani alalongia ova l diretëur dl Istitut tecnich de Urtijëi dat ora - tl prim un n iëde y pona doi iëdesc al mëns - na zaita per la jënt ladina. Si lëur da pionier tl ciamp dla jurnalistica ladina fova lià a n grum de fadies y cruzi, ma l gran ntusiasm y idealism ti ova dat la forza de publiché bel regularmënter "Nos Ladins". Mé chi che sà ciche uel dì scrì, cuordiné y mëter adum na zaita, ie bon de udëi ite l gran lëur fat dal redatëur de La Pli che vivova a Urtijëi. Y pona sce n sà mo che per la finanzië messova ël tò i dassec ora de si fuia, pona iel mo plu da se fé marueia che Erlacher ie stat bon de "tenì tres" tan giut. Che la publicazion ti ebe purtà n bel davani, chël ie bën tan che da stlù ora; na zaita per na mendranza ne puderà mei al mond vester n "afar". Burt ti aràl sapù a Erlacher messëi cunstaté cun si uedli coche "si" criatura finova bel plan via, si zaita ladina che fova danterauter la prima de chësta sort. Purmpò iel bel a dì che l prim redatëur y jurnalist ladin ne n'à nia messù la dé sù pervia che la jënt ne lijova nia si publicazion o ne fova nia nteresseda; l problem di scioldi ti fova cresciù sëura l cë ora nsci che Erlacher ne s'la udova nia plu sëurora de jì inant. Nteressant iel nce a udëi l svilup che "Nos Ladins" à fat, dantaldut ti prim ani. I argumënc che univa tratei ova da nfé cun la realtà da ntlëuta. L turism metova permò man, la gran pert dla jënt vivova dl lëur da paur y la fede cristiana ova n gran pëis danter la populazion ladina. La viëra fova iust fineda, la jënt ulova desmincé la mueies y la burta ntraunides y ti cialova cun otimism al daunì. La ndustria mpermetova truep lëur, la tecnologia metova sun l marcià d'uni sort de prodoc y sauridanzes y dut chësc ova nce n nflus sun la stampa. Cunscidran "Nos Ladins" tómel riësc tl uedl i truep inserac de retlam, suvënz metui adum drët scëmpli, ma che ova dessegur si fazion.

La Usc nr. 49 dl 2009

     

Per mascins dal lat, auti y motores, mascins per lauré l lën, ma nce per ciauzei y belijies d'or unìvel fat retlam te "Nos Ladins" y l ie nteressant a cunstaté che n valguna de chëla firmes che fajova dan plu de 40 ani retlam ie al didancuei mo presëntes sun "La Usc di Ladins". La mpostazion grafica fova dessegur adateda a chëi tëmps, nce sce tl cuntenut unìvel suvënz mescedà adum la nutizies de sport cun i ultimi defonc y i inuemes dla cëses nueves, mé per fé n ejëmpl. "Nos Ladins", che univa dal 1949 nchin al 1952 publicà un n iëde al mëns, ova pona dal 1952 inant na periodizità de chindesc disZifres sun i abunamënc ne n'iel nia plu da garat, ma n sà che la zaita univa nce mandeda ora dla Talia. L lëur da pionier che bera Silvester Erlacher, cunesciù nce sciche "Festl de Plaza" à fat per la stampa ladina ie stat n var storich, n mpëni culturel de gran mpurtanza. Dlongia vester diretëur de doi scoles a Urtijëi (scola mesana y ITC) ti stajòvel dò ala plata ladina cun gran mpëni y ntusiasm. L cuntribut che ël à dat per la jënt ladina cun si bona ulentà y idealism ne n'à degun priesc. Sciche recunescënza per dut chël che l à fat per la cultura ladina ti iel unì sëurandat, tl ann 1990 l pest "Por n'aisciöda ladina". Erlacher ie mort ai 4 de setëmber dl 1991 a Bulsan. Suplì iel unì te curtina de Urtijëi.

" La USC di Ladins", na zaita per la jënt ladina
N saut de cualità à la zaita ladina fat dal 1972 inant cun "La Usc di Ladins", bel inuem che dij tlèr ciche chësta rivista uel; vester la usc dla jënt ladina, se fé audì y lascé rundenì la "usc" danter i crëps dla Dolomites. L bel titul ova l dr. Lois Ellecosta de Al Plan de Mareo abinà per la zaita ladina che fova unìda ora per l prim iëde cun la testata nueva ai 15 de nuvëmber 1972 Do che la Union Generela ova sëuranteut la coordinazion ne n'ie nia mé cresciù l cuntenut ma nce duta la urganisazion n cont de abunamënc y retlam. Sce tulon cà per ejëmpl la prima "USC" se ntënden riësc che l se à mudà zeche ncont de mpostazion. L crëp de Mëisules, crëp ladin da ulache pëia via la valedes ladines, restova inant l simbol dla zaita.

     
 

La mpaginazion, i argumënc, dut jiva te na direzion plu profesciunela, scebën che chëi che la metova adum l fajova mé ora de ëura. Stampé stampova ntlëuta la tipografia Presel a Bulsan. Ma n muessa dì che l redatëur respunsabl Bruno Moroder de Urtijëi y l vizeredatëur Lois Trebo (che ova pona sëuranteut la respunsabltà dal 1976 nchin al 1985) sciche nce l'aministradëur Alex Moroder y mo d'autri ova fat n bon lëur. Purmpò, la "Usc" restova inant tacheda ala dlieja y mé unitant se nfidòvela a traté vel' argumënt plu zit y critich. Ma la univa lieta, y chël ie l plu mpurtant per na zaita! I ani '70 y '80 à purtà truepa mudazions te nosta valeda. La dominanza dl turism se fajova nce sentì te articuli dla "Usc", scebën che l univa tratà d'uni sort de argumënc. L fat che la "cusciënza ladina" metova sën inò man de giapé plu pëis danter nosta jënt, vën desmustrà che la "Usc" cresciova da numer a numer. Per se urganisé miec fòvel unì metù sù te uni valeda na persona che se cruziova dla coordinazion di articuli. Lois Trebo per la Val Badia, Bruno Moroder y pona Vinzenz Peristi per Gherdëina, Sergio Masarei per Fedom y Don Mazzel se cruziova dla plates dla Val de Fascia. Per la redazion de Gherdëina iel da sorissé la culaburazion de anda Malia Obletter da Cudan, che à cumedà i articuli per truep ani alalongia.
     
 
Via n Anpezo ne fova "La Usc" nia bona de pië pe nsci che permò tl 1977 iel unì sù la prima redazion; la prima plata per ampezan fova da liejer sun "La Usc di Ladins" tl numer di prim de nuvëmber 1977. Scrit fòvel unì da Flora Menardi Diornista che deberiëda cun si pere Abele (1923-1995) à curà cun mpëni y fadia la plates d'Anpezo nchin tl 1984. Ti ani 1983-84 rùven urmëi a 40 y plu plates al iëde nsci che l univa su for plu y plu la minonga y nce l bujën de dé ora la zaita plu suvënz, magari uni chindesc di. Ai 15 de auril dl 1985 - Ann di Ladins - giapova la jënt ladina doi iëdesc al mëns la nutizies n cësa y l "boom" dla "Usc" metova sën man. Redatëur respunsabl fova ntlëuta Erwin Frenes. L fova unì tëut sù la prima persona a tëmp plën, l jëunn Georg Mussner de Sëlva, che se cruziova dla coordinazion. Dlongia a avëi na persona de referimënt tla redazion zentrela de Urtijëi se fajova la Generela sën l pensier co modernisé y ti dé plu pëis ala "Usc" danter la populazion ladina. La zaita ladina ne daussova nia mé plu vester na plata "valënta" che vën lieta per savëi cie che l ie tan stat, ma n ulova arjonjer tres la "USC" nce na sort de forum de discuscion, ulache l univa mustrà sù i problems dla jënt ladina. Y iust na zaita ie n strumënt drët efiziënt te de tel situazions. I ani '80 finova via cun drët na bona nuvela per i ladins; la rujeneda ladina fova deventeda rujeneda ufiziela d'aministrazion y chësta fova per la Union Generela na bona rejon per fé n gran sforz y dé ora la "USC" n iëde al'ena. Chësc travert ie unì arjont ai prim de fauré 1990 , canche la plata ladina ruvova uni sada tla cëses de si abunei. Cun n guant nuef, n layout modern, y stampa a culëures, se presentova la "USC" sën ala jënt ladina; deberiëda a chësta ova la Generela nce tëut sù personal che se cruziova de realisé ena per ena la "Usc". La stamparia nueva fova sën la Fotolito Longo de Frangart. L fat che la discuscion ntëur la problematica ladina deventova for plu nteressanta, che n pudova viver te chëi ani na sort de "renaissance" dla ladinità ti à dessegur nce fat bon ala "Usc" ti purtan truep abunei y letëures, sciche nce simpatisanc. Trueps à permò scumencià a liejer ladin cun "La USC", chël àuden dijan for plu y plu suvënz. Do truep de ani de restruturazion y reorganisazion ie la "USC" urmei deventeda n mesun primèr de comunicazion y nfurmazion per la jënt ladina. Sambën che nce la funzion culturel-soziela, sciche nce istrutiva, dla "USC" ie de gran mpurtanza per nosta mendranza. Y che la "Usc" devënte for plu y plu la usc de duc i ladins chël ti mbincions de cuer.
   
     
Priesc dl abunamënt y dla zaita singula dal 1949 al 2005
Ann
priesc
priesc abo.
edizion
1949
15 lire
-
1x al mëns
1955
25 lire
350 lire
1x al mëns
1960
25 lire
400 lire
1x al mëns
1965
40 lire
500 lire
1x al mëns
1970
50 lire
800 lire
1x al mëns
1972
100 lire
1.000 lire
1x al mëns
1977
500 lire
5.000 lire
1x al mëns
1982
1.200 lire
12.000 lire
1x al mëns
1985
1.500 lire
15.000 lire
2x al mëns
1990
1.500 lire
40.000 lire
1x al'ena
1995
1.500 lire
60.000 lire
1x al'ena
1999
2.000 lire
73.000 lire
1x al'ena
2000
2.200 lire
80.000 lire
1x al'ena
2001
 lire
80.000 lire
1x al'ena
2002
 lire
45,00 Euro
1x al'ena
2003
  45,00 Euro
1x al'ena
2004
  45,00 Euro
1x al'ena
2005
1,20 Euro
47.00 Euro
1x al'ena
2006
1,20 Euro
47.00 Euro
1x al'ena
2007
1,50 Euro
49.00 Euro
1x al'ena
2008
1,50 Euro
54.00 Euro
1x al'ena
2009
1,50 Euro
54.00 Euro
1x al'ena
2010
1,50 Euro
54.00 Euro
1x al'ena
2011
1,60 Euro
58.00 Euro
1x al'ena
2012
1,60 Euro
59.00 Euro
1x al'ena
2013
1,80 Euro
64.00 Euro
1x al'ena

Abunamënc dal 2000 al 2012

Ann
Gherdëina
Val Badia
Fascia
Fodom
Ampez
2000
905
1.312
525
140
111
2001
908 1.368 495 142 99
2002
904 1.401 468 135 95
2003
914 1.416 460 129 81
2004
907
1.452
462
130
79
2005
906
1.475
490
138
89
2006
911 1.499 476 134 80
2007
935 1.528 505 133 83
2008
934 1.531 514 143 85
2009
932 1.531 518 146 89
2010
932 1.552 531 144 84
2011
922 1.586 540 138 84
2012
909 1.586 550 136 80
2013
         

 

 

I redadëures dla USC DI LADINS per  Gherdëina dal 1972
   

 

Bruno Moroder
(dal 1972 - 1974)

Vinzenz Peristi
(dal 1974 - 1984)

Egon Vinatzer
(dal 1984 - 1986)

Peter Kostner
(dal 1984 - 1986)


Georg Mussner
(dal 1986 - 1997)

Alexia Grossi
(dal 1997 - 1998)

Alexander Stuffer
(dal1999 - 2000)

David Lardschneider
(dal 2000 inant)

 

 

 

I diretëures dla USC fova y ie:
   
   

 

Sylvester Erlacher
(dal 1949 - 1972)

Bruno Moroder
(dal 1972 - 1976)

Lois Trebo
(dal 1976 - 1986)

Erwin Frenes
(dal 1986 - 1989)

       
 
 
 

Georg Mussner
(dal 1989 - 1999)

Iaco Rigo
(dal 1999 inant)

 


I vares plu mpurtanc dal 1949 nchin al didancuei

L prim numer de la plata "NOS LADINS" unit ora ai prim de merz 1949

La prima "La USC di Ladins" nuvëmber 1972

Cun chësta plata a culëures nviova via "La USC di Ladins" 1985

Dai prim de fauré vën ora
"La USC di Ladins" n iëde al ena, tl prim de sada y sen de venderdí


  
   
 
 

Ladin Italiano Deutsch