Bënunì
 

2015

 

Setant’ani Union di Ladins de Gherdëina

La fova nasciuda ai 19 lugio 1945 a Urtijëi y fova dessegur una dla prima lies te duta la Ladinia do la Segonda Viera Mundiela.

Co se porta pa la Union di Ladins de Gherdëina (ULG) chësta bela età?  

 

 
   
 

ULG - Co se porta pa la Union di Ladins de Gherdëina ULG chësta bela età? - Dan dé na resposta a chësta dumanda, vàla de lecurdé che ades nianca no trëi mënsc do la fin dla viera se ova l sentimënt de purtenienza a na grupa de rujeneda extra, dlongia la doi grupes de rujeneda taliana y tudëscia, descedà ora do na nuet longia de n durmì, suvënz sfurzà su da chëla populazions che ova ti ultimi centeneies tëut la sëuravënta tl raion storich dla “vedla Ladinia”. Ma do na tel durmida, ie dijësse monce “ndormia”, se òvel te n colp descedà ora l sentimënt de purtenienza y de identità danter nosta jënt. Dessegur fòvel stat nce per gauja dla viera, ma mo deplù per la furtuna de avëi śën l mesun de goder la libertà y la pesc de ti dé la prima sburdla a se mëter adum per mëter su na grupa che pudova luné danora a se dé na forma de identificazion ndividuela y coletiva.

La rujeneda ladina coche liam

La cossa che liova adum chësc sentimënt ne pudova vester nia auter che la rujeneda ladina, n bën culturel da cultivé y tenì su, ma nce n valor etnich che se damanda scunanza iuridica.

La lia nasc tl 1945

Per arjonjer chisc ubietifs se ova 19 uemes de Urtijëi abinà n juebia ai 19 de lugio dl 1945 tal Hotel Madonna y ova metù su la Union di Ladins. Na Union di Ladins che aldò dla pruposta de bera Leo Demetz dla Cademia ëssa dassù tò ite nia mé Gherdëina, ma do y do nce l’autra valedes ladines ntëur al Sela y Ampëz. Mpede n presidënt òven pra chësta prima ancunteda metù su trëi uemes - bera Luis Trenker, bera Leo Demetz dla Cademia y bera Franz Prugger - che dassova se cruzië de arjonjer n recunescimënt de chësta lia nueva da pert dl’autoriteies che fova ntlëuta la Prefetetura y la Questura. L se tratova de n mumënt scialdi zite, ulache plu che la Prefetura y la Questura òvel monce dovia truep da n dì l’autoriteies plu autes dl militer american che fova a Bulsan. 

Memorandum y prim program

 

 

Ai 22 de lugio dl 1945 ova 22 uemes de Urtijëi sotscrit n memorandum, che n ti ova pona fat avëi al Prefet de Bulsan (protocoleda al nr. 5492 permò cun data 13/10/1945 pra la Prefetura), deberieda cun l prim Statut dla Union di Ladins de Gherdëina y n program de cieche la Union se tulova dant y che repurton tlo dessëura.

Gherdëina pra Belun?

Pra na adunanza generela, che fova stata ai 8 de agost dl 1945 tla veranda dl Hotel Posta (ja Dëur), ulache l fova ruvà adum zirca 200 persones, fòvela bele unida plu ciauda, liéjen ora dl protocol dla senteda. N ova ulù stlarì defin cie che n ulova se tò dant cun chësta lia nueva y desgorjer la ujes che fova unides metudes ncantëur, che dijova che “l Cumité dla Union di Ladins lëura per tré Gherdëina per jì cun la Provinzia de Belun”. Ma chësta fova mé stata propaganda contra i “Dobleiber”, zënza deguna desmustrazion segura di fac y daniëura striteda ju da chisc ultims (zeche deplù iel da liejer tla plates 72-75 dl Calënder de Gherdëina dl 2013).

L prim cunsëi y l prim presidënt tl 1946

Permò do n ann de vita dla Union di Ladins fòvel unì lità, pra la reunion generela ai 17 de lugio dl 1946, l prim Cunsëi y l prim presidënt tla persona de bera Franz Prugger. Da ntlëuta inant àl metù man n’atività drët ntensiva n con’ de mëter a jì duta chëla azions che jiva debujën per renfurzé l sentimënt y la identità ladina. Prësc ova i uemes dl Cunsëi dla Union di Ladins de Gherdëina udù ite che n messova mustré su tla vita publica che n ulova sëuraviver, do duta la burta ntraunides dla Segonda Viera Mundiela, nia mé economicamënter, ma nce y dantaldut culturalmënter, mustran su nosta identità ladina.

Ladin tl radio - I meric dla ULG

Scumencià òven cun l se cruzië che tl radio unìssel rujenà nce ladin, y nsci nasciova la prima trasmiscion ladina tres la RAI de Bulsan. L fova ai 4 de auril dl 1946, canche l poeta y scritëur Max Tosi ova pudù rujené tl radio per gherdëina. Y sce on al didancuei regularmënter trasmiscions ladines tl radio y nce tla televijion, ne daussons mei desmincé che tlo iel stat dantandut la Union di Ladins de Gherdëina a arjonjer chësta doi seves dla cultura ladina.

La scola paritetica tla valedes ladines

Ma la seva plu sterscia dla cultura ladina ti ova la Union di Ladins de Gherdëina y pona nce la Union di Ladins dla Val Badia dat cun la gran batalia per arjonjer tl 1948 la ntroduzion dla Scola Paritetica Ladina tla localiteies ladines dla Provinzia de Bulsan. Na arjonta che ti ultimi 30-40 ani à pià dassënn pe tres la arjonta dla Ntendënza Ladina y d’autra istituzions coche l Istitut Pedagogich Ladin y al didancuei l Servisc Inuvazion y Cunsulënza.

Libri tla rujeneda dl’oma

Na terza seva dla cultura ladina ie bën nce unida a s’l dé tres la publicazions de libri per gherdëina, ulache la ULG à ënghe metù, do la viera, l prim sas tres la publicazion dl Calënder de Gherdëina dal ann 1948 inant, deberieda cun truepa d’autra publicazions che cuer belau uni ciamp dla vita te nosta valeda. L resultat de chësta atività ie nce da udëi tla prima bela Biblioteca Ladina, dedicheda l ann passà a Anda Malia da Cudan. Nia da desmincé ne n’ie la sburdla data dala Union di Ladins de Gherdëina, ti ultimi 70 ani, a truepa d’autra formes de esprescions dla vita, acioche l gherdëina vënie tëut ca for plu y plu, te uni ucajion publica o privata.

La Cësa di Ladins

Che l zënter culturel nia mé dla ULG y dla Union Generela di Ladins dla Dolomites, ma nce de truepa d’autra lies de Urtijëi y de duta Gherdëina ie stata la Cësa di Ladins a Urtijëi, ne possa plu deguni fé finta de no savëi. Dal 1954 inant nchin a dan n valgun ani, da canche la cësa ne n’ie dut ntëur nia plu drë’ a norma per la segurëza y cun stënta de lerch, iel te chësta Cësa nasciù ora dla ULG plu lies: l Cumité Radio Ladin, l Museum de Gherdëina, la Lia dl Teater, la grupa Jëuni de Mujiga, la Lia di studënc universiteres di ani sessanta. Truepa d’autra lies, mé per dì cores, mujighes, la Lia dal Bal populer y la Lia dai guanc dala gherdëina, lies de teater da demez y la scoles y n.i. à pudù purté dant y svilupé si atività te chësta cësa. La ULG nstëssa à te duc chisc ani metù a jì plu iedesc cungresc, dis culturei, cunferënzes y truepa d’autra ativiteies cultureles d’uni sort.

La Usc di Ladins

Nia da desmincé ne n’iel che la Union di Ladins de Gherdëina ie stata determinanta tl tò, pra la Union Generela di Ladins dla Dolomites UGLD, la dezijion de jì inant cun la publicazion “Nos Ladins”, dajan ora la plata nueva “La Usc di Ladins” dal 1972 inant. Ntlëuta ova l presidënt dla UGLD, bera Bruno Moroder, pià do la ncëria de redadëur respunsabl de chësta zaita, ntan che l fova bele scialdi mpenià cun la trasmiscion ladines dla RAI y laurova pea coche cunselier dla Union di Ladins de Gherdëina.

 

 

 

Atività culturela

Che l’atività tla Cësa di Ladins ie unida smendreda ajache la gran sala de teater ne fova nia plu a norma ti ultimi ani, da coche l ie unì dit, y stluta defin dal 2012 incà, ne ti à nia tëut ala Union di Ladins l mesun de se cruzië inant de dut cieche a da n fé cun la cultura y rujeneda ladina, purtan inant na gran atività, nce sce cun finanziamënc smendrei de ades l 80% permez ai ani dan l 2010. Ma sambën che truepa ativiteies cultureles ladines vën nce fates dedora dla Cësa di Ladins y chël ie inò indiretamënter na arjonta dla Union di Ladins, che se à daniëura batù acioche nosta cultura ladina y nosta rujeneda de Gherdëina vënie tëuta ca nce dal’autra lies de cultura che on te nosta valeda. Ma la ne fova pa nia nscila, plu da giut, y nianca no tan plu da giut. Śën iel per truepa lies te Gherdëina na cossa defin normala de se identifiché nce tulan ca l gherdëina te si lia, ma mo plu lies y d’autra grupes dla sozietà pudëssa ti fé do, auzan nsci l valor dla rujeneda ladina, ti dajan n senificat plu senzier ala detlarazion de purtenienza ala grupa de rujeneda  ladina, che à tl 2011 a Urtijëi arjont l 84,19% (Astatinfo 38/2012).

Mbën, la Union di Ladins de Gherdëina, cun si 70 ani de vita, ne n’ie no vedla no jëuna, ma na lia che va dessegur debujën acioche te nosta sozietà ne ébel nia la sëuravënta l descredité de chël che caraterisea dantaldut la cultura de nosc raion: nosta rujeneda de gherdëina. Perchël iel da ti mbincé a chësta lia y n particuler a si cumëmbri de ti fé curaje a duc chëi che à a cuer la cultura ladina a se dé ju cun duta l’ativiteies che possa tenì mpe la seves plu mpurtantes dla cultura ladina. Y chëles, dijions mo n iede, ie dantaldut la rujeneda ladina ti ambienc dla sozietà coche: la familia, la scola, la dlieja, i massmedia radio y TV, y la lies che fej cultura nia mé di ladins, ma nce ladina.

 

Vinzenz Peristi

cunselier dla ULG.

   
  articul nce tla USC DI LADINS nr. 27 dl 17-7-2015
   
   
 

2014

   
 

30 y 31 de agost 2014  festa de i 60 ani dla Cësa di Ladins

   
 


 

La Union di Ladins de Gherdëina ie na lia culturela che se dà ca cun amor y artenienza bele da plu de 60 ani per l svilup dla cultura ladina. La Union di Ladins à purtà pro dassënn che l ladin vënie nsenià te scola y che on istituzions ladines.


Nëus son cumëmbri dla Union Generela di Ladins dla Dolomites che dà ora uni ena la Usc di Ladins, la sëula zaita per duc i ladins. Tres la gran produzion leterera de nosta lia à l ladin pudù crëscer ite te uni forma de test y domins de comunicazion. Monce vel’ gran poet ladin à abinà te nosta lia si ncësa.

La gran tradizion de fé pea te nosta lia à purtà pro che on pudù festejé tl 2011 l centejim ann da canche l ie unì ora l prim Calënder de Gherdëina, na publicazion che dajon ora uni ann y che ruva te plu de mile families de Gherdëina.

Bele ti prims ani dala fundazion se ova i cumëmbri cruzià de fé su nosta cësa de cultura, la Cësa di Ladins, njenian ite la prima bibliotech ladina che vën al didancuei prijeda per si documënc de valuta.

Tla sala teater à pudù se dejëujer i prims cungresc interladins, truep cunzerc, teatri y chino.

Dala Union di Ladins ie nce nasciuda la lia Museum de Gherdëina, che à si sënta tla Cësa di Ladins y che possa mustré su un di museums de majera valuta dl raion dla Dolomites.

La lia à al didancuei ntëur ai 300 scric ite che paia ite uni ann la cherta de cumëmber. I scric ite giapa duta la publicazions a miëur marcià y possa nce ti cialé debant ala bela culezions dl Museum de Gherdëina. Oradechël à nosc cumëmbri la rejon de lité l cunsëi che resta trëi ani alalongia tla ncëria.

Nëus meton a jì truepa manifestazions cultureles y se ncunferton de pudëi saludé nce vo tlo da nëus.

1953


agost 1954


Festa de inaugurazion dl ngrandiment dl Cësa di Ladins
ai 15.6.1986

2014

Nosta adres:

Union di Ladins de Gherdëina "U.L.G."
Streda Rezia Nr. 83 - Cësa di Ladins

I-39046 Urtijëi (BZ) 

 

Tel. 0471 79 68 70 -  E-Mail: info@ulg.it  

 

C.F.:00415580216  No. REA: BZ -94533

 

Nosc contcurent pra la CASSA RAIFFEISEN CIASTEL - URTIJËI:

IBAN: IT 45 D 08056 23120 000302057301            BIC: RZSBIT21211

La Union di Ladins de Gherdëina ie

- n Ente Morale dal 24/8/1954 (*)    y

- na Lia juridicamënter recunesciuda, scrita ite tl register dla persones juridiches tení dal Tribunal de Bulsan al n.28 dal 09/5/1955 incá, sciche zertificá dal Cumissariat dl Guviern de Bulsan (**)  y 

- na Lia scrita ite pra la lista dla urganisazions de ulëntariat , aldò dla lege provinziela

nr. 11 dl 01/07/1993 cun decret dl Presidënt dla Jonta Provinziela nr. 21/1.1 dl 17/02/1995 (***) , daviadechël ie la U.L.G. nce 

- na Lia ONLUS.

 

La Union di Ladins de Gherdeina ie nce su F A C E B O O K

                            (*)                                                  (**)

per ngrandí

 

per ngrandí

 

   

(***)

     

per ngrandí

     
 

Copyright  ©

La struttura e il contenuto di questo sito web   ( www.ulg.it )  sono protetti da copyright. La riproduzione d'informazioni e di dati, in particolare l'uso di testi, parti di testo o immagini, deve essere approvata espressamente dalla Union di Ladins de Gherdëina

Flag Counterfree hit counter
Ladin Italiano Deutsch